तू येतेस

 
 
माझ्याभोवती इतका गुंता
विचारांचा 
नात्यांचा 
माणसांचा 

तू येतेस धावदोऱ्याच्या टाक्यांसारखी 
सरळ 
स्पष्ट
सोपी 

माझ्याभोवती रंगीत गोंगाट
भडक  
अंदाधुंद 
कर्कश्श 

तू येतेस जुईच्या फुलासारखी 
नाजूक 
निर्मळ 
सुगंधीत  

माझ्याभोवती रोज लढाई 
वेळेची 
पैशांची 
विचारांची  

तू येतेस चिमणपाखरासारखी 
स्वच्छंद  
निष्पाप 
आनंदी 

तू येतेस 
मला वाचवतेस 
माझे भान सावरतेस 

पुन्हा कदाचित 
रस्ता चुकेल 
दिशा हरवेल 
ओळख पुसेल   

तेंव्हा सुद्धा 
पुन्हा ये 
उसवलेल्या मनाला 
टाका घालून जा 
उदास निराश जगण्याला 
अत्तर लावून जा 
पराभूत जीवाला
पंख देऊन जा 

तुझे हात माळून जा 
माझ्याभोवती 

- जुई