मला कळतंय

 
घर-परंपरांच्या चौकटीत आल्यापासून सारखंच 
तुझं मन अडकलेल्या पाखरासारखं रडतंय 
मला कळतंय ...
पण चौकट मोडायचा धीर तुझा तुलाच शोधला पाहिजे 

मनापासून पाहिलेलं, हौसेने खुलवलेलं 
तुझं स्वप्न उंबऱ्याबाहेर जाण्यासाठी पळतंय 
मला कळतंय ...
पण स्वप्नासारखंच सत्यही तुला डोळे उघडून पाहिलं पाहिजे 

निराशेच्या अंधारात स्वतःशीच झुरताना 
डोळ्यामधून पाझरणारं पदरामागेच अडतंय 
मला कळतंय ...
पण आसवांना थांबवून आतल्या आवाजाला शोधलं पाहिजे 

नाती-गोती, रूढी-विधी यात सगळे गुंतले असता 
खिडकी बाहेरचं मुक्त जग खुणावून तुला छळतंय 
मला कळतंय ...
पण जुन्या डोळ्यांना नवीन दृष्टी द्यायला आता शिकलं पाहिजे 

धाक, आदर, प्रेम अश्या न तुटणाऱ्या बंधनातून 
बाहेर पडायच्या विचारांनी तुझं काळीज हलतंय 
मला कळतंय...
पण या हिमतीचं मोल जाणून तुला पाऊल उचललं पाहिजे 
     या हिमतीचं मोल जाणून तुला पाऊल उचललंच पाहिजे 

- जुई